هل تطعمين طفلك خرابيط أم أكل صحي

كيف حلكم أمهات نساء حريم صار لي زمان ما خشيت المنتدى
واليوم حابه أتفلسف أشويه ...... سوالف حريم يعني
أني أم لأول مره ولدي عمره تسعة شهور وأني أبغى أحافظ على هذا الولد من كل شيء الله يخلي ليكم أولادك ولا تشوفوا سوء
المهم .....ز
أني أبغي أعود ولدي على الأكل الصحي يعني فواكه خضار لحوم زبادي خبز ......يعني أكل صحي يعطيه العناصر الغذائية المهمه والأساسية وبس
ومو حابه أبدا أعلم ولدي على أكل الخرابيط وكل ما تشوفني وحده أكبر مني ويكون عندها أكثر من واحد تجي تنصحني عوديه على الخرابيط أحسن لأن بعدين ما بحب ياكلها اذا ما عودتيه بس أني ما أطاوعهم وأقول في نفسي كل واحد حر في تربيه أولاده
في يوم من الايام تفشلت حدي فشلتني وحده
كنت رايحة زيارة وشافتني وحده وطلعت من شنطتها كيس شيبس وعطته ولدي أني قلت لها ولدي بعدني ما أعوده على الخرابيط وهي مصره تقول أفتحي الكيس وأعطيه وأني مو راضيه
وبعدين قالت لي أن بنتها لما كانت في عمر ولدي كانت تعطيه اخرابيط وتاكل عادي وأني أقول لها ولدي ما أبغي أعوده على أكل الخرابيط وصارت كل أشويه وتقولي أفتحي الكيس وأعطيه المهم المجلس كان فيه مجموعه من الحخضور وأني كل ما قالت لي أفتحي الكيس أعصب من داخل لحد ما نفجر البالون الي داخلي وأني متفشبله حدي وأظطريت أني افتح الكيس وأعطي ولدي عود شيبس واحد حتى أن ولدي كان يفكرني عاطيته لعبه وبعدين أكل العود وأنا متفشله ومن قهره حدي لأني كسرت كلمتي علشان أرضي الحرمه الي ركبت رأسها وأني خايفه أن ولدي يبتدي يتعود على أكل الخرابيط وهو بعده ما يكمل السنه أني عن نفسي أحس أنه حرام نلعب على أطفالنا ونعطيهم خرابيط والله سبحانه وفر لنا الاكل الصحي

اللي تسويه مرة تمام.. بس زي ما شفتي وصار لش لازم تخرج الأمور عن السيطرة بعض الأحيان
بس طول ما الشي بايدنا زي ماقلتي حرام نعطيهم.. بكرة بيكبروا وبياكلوا كل شي
بس اهم شي نحط ليهم نظام ومانخلي الموضوع سايب والحرمان مو زين بيسبب ليهم ردة فعل
ولا تخافي مابيبتدي يتعود عشان مرة وحدة.. بعدهم صغار وياكلوا اللي احنا نوفره ليهم

اني حتى البسكوت ماحب أعطيها في اي وقت.. لكن بس كبرت صار لازم اعطيها في الطلعات عشان تنشغل شوي
ووحدة جزاها الله خير قالت انها تعطي ولدها بسكوت تمر..عجبتني الفكرة مرة صرت اخذ ليها عشان فوايد التمر

ممكن تسوي دي الحركة تحملي له شي اذا احد سوى لش دي الحركة قولي ليهم ماياكل تشبس وطلعي له الشي اللي انتين جايبتنه.. مو تقولي انتين ماتبغي تعطيه خليه كن هو مايحب التشبس

مرة في بيت ابوي الجهال ياكلوا تشبس وبتي استجنت واللي يقول عادي وكملت السنة ومن هالكلام.. بس اني عندي حتى لو كملت هي ماتدري وشو دا بس لأنهم ياكلوا تبغى منه واستسلمت خليتهم يعطوها
شوي وجا على بالي أجيب ليها عنب.. اكلت العنب ونست التشبس..ؤوتحسفت استعجلت وعطيتها
هم مايدروا بالدنيا ياكلوا اللي نعطيهم.. الفواكه ألذ وأفود

شكرا بسمه بريئه عجبتني ا لفكره لازم أحط في الشنطة الأكل الي أنا أحب أعطيه لولدي ولو وحده عطتني خرابيط أقولها مايحبه وماياكلها فيه بسكويت خاص حق التسنين أفكر أعطيه منه لأنه بكون خاص حق الأطفال ويناسب هذه الفتره شكرا لك والله يخلي لش بنتش وتفرحي فيها وتشوفيها عروس