أدري تأخرت عليكم .. نوورائي اناارت حياتي

السلام عليكم ورحمة الله وبركاته ..
أدري تأخرت عليكم وااايد في الرد والمفروض من زمااان
أبشركم بولادتي .. بس عفسه الولاادة وتعبها خلووني انشغل
الموهيم حبيت ابلغكم اني قبل شهرين ,,
بالتحديد تاريخ 6-7-1431هـ الله رزقني ببنوته زي القمر .. وأسميناها نوراء
طبعاً بعد صرااااع رهيييييييب ويا زوجي الحبيب على الاسم ..
بس الحمدلله وافق وسمينها ..

ولادتي كانت في مستشفى اسطون في الخبر ..
وكانت برحمة رب العالمين .. وبركة آل البيت سهااالة ولله الحمد ..
طبعاً قصتي كانت حمااس شويات بس شويات ..
طبعاً زي العادة يوم الاربعاء رحت بيت جدي .. وكنا مجتمعين وسوالف ووناسة
وماكان فييني اي حاجة ., بعدين مر علي زوجي ورجعنا الشقة ..
كلمتني وحدة من صاحباتي قالت ليي مو كأنش تأخرتي قلت ليها لا بس المفروض
بعد بكرة موعدي ., قالت لي تدري .. صلي ركعتين بنية الولادة وأقري حديث الكساء
وأن شاء الله ربي ييسر عليش ,, وفعلاً بعد مارجعت الشقة .. حفيت وأستعديت ..
تروشت وسشورت شعري ,, وقصيت قصتي بعد << متفرررررررغة .. وتعطرت ولبست
احراامي .. وصليت الصلاة الي قالتها لي صاحبتي .. وكنت حاطة قدامي غرشة ماي
واني اقرا حديث الكساء .. وبعد ماخلصت شربت منها شوي ونمت .. وماكان فيني شي
صحيت من النوم الظهر .. أحس بألم في ظهري زي ألم الدورة .. بس ألم .. دخلت الحمام تكرموا
وكان نازل علي دم خفيف .. كلمت زوجي وبدت الاستعداادات وحالة الاستنفار في بيت عمي ..
عطتني عمتي صحن فيه سبع تمرات .. وقالت لي اكلهم .. وشربت ماي .. وقريت ليي شوي قران
ووانطلقنا المستشفى .. وصلنا ع الساعة 2 دخلوني المستشفى .. وكان الرحم فاتح بس 2 سم
ضليييت في غرفتي لين المغرب الساعة 7 وشوي وكنت مرة تعبانة .. والطلق يروح ويجي .. كان منتظم
وتاعبني وااجد .. وكنت ادعي ربي يسهل عليي .. ودايما اقول ((يامخلص النفس من النفس خلصني يارب ))
طبعاً الدكتورة خلال هالوقت جات فحصتني مرتين وكان زي ماهو ماتغير ..
بعدها جات الممرضة ولعبت عليي قالت ليي بعطيش ابرة تسكن الالم وعطتني ابرة وماشفت الا الالم زااد
وكل ماله يزيد .. وأني متأزمة .. كل ماطالعت في زوجي وهو قاعد احس الدمووع تتجمع في عيوني ..
ليش مادري .. حطيت محطة الانوار << لحسن حظي كانت موجودة وكانوا يجيبوا ادعية .. وعزا وقعدت
اتسمع طبعاً كنت مجهزة Mp3 حقتي وحاطة فيها موالد .. وسور قراان .. عشان اتسمعهم وألهي شوي عن الالم
بعدين جات الممرضة ليي وقالت ليي مدام لازم تنزلي تحت عشان نقدر نعطيش مسكنات .. وع الساعة 7 وشوي
نزلوني قسم الولادة .. ودخلوني غرفتي الي بولد فيها .. وزاد الطلق وانتظم اكثر وصرت اتعب اكثر واكثر الساعة وصلت الى الساعة 9 واني
متحملة الالم وخلاااص حسيت اني بمووت من التعب .. واخر مرة لما جات الدكتورة فحصتني جابت لي حالة احباط
قالت لي للحين 2 سم
تخيلووا ..! من 2 الظهر الى الساعة 9 واحنا ع هالحال وقالت ليي خلاص مابجي افحصش الا الساعة 12
كان الالم شديد قلت لها دكتورة ابغا مسكن .. قالت لي اي مسكن قلت لها مسكن الظهر .. قالت لي هدا خارج التأمين
قلت لها اوكي مو مشكلة .. طبعاً طول الوقت زوجي كان قاعد فوق في غرفتي ينتظرني اولد .. هو ماكان موافق على الابرة
بس اني كلمته قلت له خلاص بمووت ابغا الابرة ماني قاادرة .. قال خطيرة .. قلت له بمووت ابغااها مالي دخل ..
وجا وقع وعطوني الاببرة .. الله وكيلكم ضربتني الابرة وبعدها ماحسيت بشي نهااائياً .. الحمدلله
وبعدين على الساعة 1 حسيت بثقل مو طبيعي .. وماكان في احد حوالي .. ناديت الممرضة ..
قلت لها ترى احس بثقل .. فحصتني الا هي تقول ماشاء الله فتح 9 سم .. ابتسمت قلت لها تمزحي ..!
قالت لا .. كلمت زوجي قلت له ترى فتح 9 سم .. قال خلاص بعد الصلاة بجيش ..!
قلت له طيب .. وع الساعة 1ونص بدى يحمى الطلق يحمى يحمى يحمى .. بدينا في عملية الولادة ..
درجتني الدكتورة عشان عملية التوسيع حسيت بالشقة وسمعت الصوت بس كان بدون الم بسبب التخدير
كنت حاسة بكل الي يصير بس الالم ماكنت احس به كيف لا تسألوني
بدت تقول لي ادفعي ادفعي .. واني ادفع .. ادفع وادفع .. الساعة 2طلعت القمر نوراء الى الدنيا ..
في البداية ماصرخت .. بس بعد ما شفطووا من فمها العفسات صرخت ..
اول ماشفتها دمعت عيووني .. وأبتسمت بشكل مو طبيعي
كانت تصيح كنت احسها تناديني وتقول لي ماما اني جيت .. كل ماصرخت رديت عليهها وقلت لها اماايي
جابوها وشفتها ,, وكانت شبه اختي الصغيرة ..أخدوها للحضانة وضليت تحت شويات .. طبعاً اول ماطلعت
دقيت على زوجي بشرته اني ولدت .. ماصدقني ..! ما استوعب اني ولدت .. قلت له وربي ولدت .. سكر من عندي
وكلها ثلث ساعة الا هو وخواته واخوه الصغير عندي .. وضلوا وياي لين ركبوني فوق .. بعدها رجلي راح البيت
وطبعاً ضليت سهراانة لين جابوا لي نوراء الصباح الساعة 11 وشوي .. طبعاً من الساعة 7 واني ادق على الحضانة ابغاها بس
هم مو راضيين يجيبوها ليي .. يقولوا لازم يشوفها الدكتوور ..
ماتتصوروا لما جابوها لي شقد طاار قلبي وفرحت بشكل مو طبيعي .. أخذتها وضميتها .. وع طول حاولت ارضعها
كااان احساس ولا اروع .. والحين صار عمرها شهرين و24 يوم
ربي يخليها ويحفظها لي .. عذراً ع التأخير .. وع الاطالة .. سلااموون عليكم

weamp