ممكن تساعدوني من خبراتكم؟؟

السلام عليكم ياأمهات وكروشات
طبعا أول موضوع ليي وبدون إي مقدمات نبدأ:
أني حامل في الشهر السادس وبولد إن شاء الله بالسلامه في بدايه ذي القعده وأول حمل ليي على خير
أبيكم تساعدوني ويش أشتري وويش المقاسات _كم لو نص كم

ناس واجد قالو لي لا اشتري نيوبورن وأني أحس إلي من 0-3 كبار على حديثي الولاده وماادري ويش الحل
وناس قالو لي اشتري المقاسات نيوبورن ومن 0-3 ومن 3-6 وموعارفه هل بيكون الجو حر أو برد عشان اعرف اشتري صيفي لو شتوي
لأني أتوقع إلي مقاسه من 3-6 بيكون الجو بارد

يالله ابيكم تساعدوني على كل كبيره وصغيره في موضوع المستلزمات الطفل ماعندي أحد غيركم

ورحم الله والديها إلي بتساعدني من خبرتها

المقاس يعتمد على حجم الطفل وهالشي صعب يتحدد قبل الولادة..
عشان تشديه اخذي بس 3 لبسات نيوبورن واذا طلع النونو صغنون رسلي احد يجيب لش زيادة
والباقي اخذيهم 0-3..
اما 3-6 بدري عليهم.. بالذات اذا طلع النونو صغير بيطول في 0-3
بتملي وبتشتهي تطلعي وتجددي

وذي القعدة يصادف شهر اكتوبر بداية الخريف
الجو بيكون بين حار ومعتدل.. واتوقع اغلبه حار
وتاخذي كم لو لا.. اتوقع تاخذي مشكل.. ان شالله يساعدوش باقي الامهات اكثر
لأن بتي مواليد اخر الشتا فاخذت ليها كله مكمم.. وللحين ألبسها مكمم بس وقت النوم لأن الغرفة تصير ثلج

ويش تشتري... اول شي الملابس.. اذا بتلبسي البيبي في النهار نص كم ووقت النوم كم.. بتحتاجي تقريبا:
ملابس داخلية.. 7- 10
ملابس نص كم.. 7
ملابس كم.. 7
مريلات.. 3
قبعات 3

للنوم
4-5 مفارش و8-10 قماطات
سرير ومفرشه
جهاز مراقبة اذا غرفة النونو بعيدة

و للحمام والتبديل
فوطتين صغار للتغيير وفوطتين كبار للسباحة
مفرش او طاولة تبديل
كريم الحفاظ سودو كريم
اعواد اذن
ومجموعة العناية (شامبو - صابون - لوشن)
مقص اظافر
وفرشاة شعر
ومناديل مرطبة
كحول لتنظيف السر اول الايام
حفاظات

للرضاعة
2-3 مراضع 60 مل
فرشاة تنظيف
محلول تعقيم او جهاز تعقيم اذا ماتفضلي تغليهم بالطريقة التقليدية
وشفاط للحليب اذا تحبي

للطلعة
شنطة اغراض البيبي
عربة وكرسي سيارة

للأم
ملابس الاستقبال
ملابس داخلية للرضاعة
قطن الصدر عن تسرب الحليب
كريم للصدر عن التشققات خذي النوع اللي مايحتاج ينغسل قبل الرضاعة
كلوتات الاستخدام الواحد وفوط صحية
الكريم والغسول اسألي الطبيبة لما تولد توصف لش وتعلمش طريقة الاستخدام وعدد المرات

... الأعداد المذكورة تقريبية انتين شوفي وش يناسبش

الله يتمم لش ويبلغش شوفة ضناش سالم

فيه شي ضروري نسيت اذكره لش.. ميزان الحرارة
وعندش حق الاذن استخدامه مرة سهل ومايضايق النونو.. اني جربت براون.. ومرة زين
وانصحش تجربيه على النونو عدة مرات في اليوم عشان تعرفي حرارة جسمه الطبيعية
عشان لو لا سمح الله مرة شكيتي ان حرارته مرتفعة قيدش تعرفي الطبيعية وتقدري تقارني

اشياء تذكرتها زيادة..

- القماطات.. انتبهي مايكون مقاسها اصغر من 32*32

- الشبكات الداخليه.. اذا كان الوقت صيف وبنوتة.. اخذي نصهم مسير.. او كلهم

- الشبكات الخارجية.. الافضل تاخذي اللي رجوله مفتوحة بيكفي البيبي مدة اطول

- القبعات.. تاكدي انهم مقاس صغنون.. اني بتي مازبط عليها الا ثنتين

- المراضع افضل شي بيجون وافنت وتغيري حلماتهم كل شهرين

- مجموعة العناية والخفاظات.. خذيهم الحجم الصغير عشان اذا ما عجبش او تحسست بشرة الطفل تغيريهم

- اختراع ممكن يفيدش في الطلعة.. اكياس للحفاظات.. فيه من مذركير تجي معطرة


واللي نسيته..
بتحتاجي بعد بطانيتين .. لو كان المكان مرة بارد بتختاجي تغطي النونو