مرحبا فيكم جميعا عجبني الموضوع وحبيت أشارك معكم وهذه أول مشاركة لي بالمنتدى
عجبتني المناغات الي ذكرتوها وانشاء الله أحاول أحفظها وأقولها الى ولدي منتظر
لأني أناغي ولدي خرابيش من تأليفي مثلا اذا جلس من النوم وأبغي أسوي له سبوحه أقول له
يا بعد عيني هالقمر غالي ويحبونه واذا جلس من النوم أهله يسبحونه ويا بعد عيني هالقمر غالي ويحبونه واذا جلس من النوم قاموا يلعبونه
وبعد منتظر شاطر يعرف يكتب ويذاكر ويقرأ على المنابر لا اله الا الله محمد رسول الله علي ولي الله
وبعد بدرنا وأنيسنا قاعد في أتوبيسنا عنده ورده حمراء مخبيها للماما وعنده ورده بيضاء مخبيها للبابا وعنده قلم رصاص يرسم فراشة
وبعد أبو الخدود الوردية لابس بدله قطنية و جايب الى أمه هدية والى أبوه طاقية والى أخته تركية والى الصاله زولية والى المطبخ صفرية
وبعد منتظر شاطر يتجول في البساتين يأكل خوخ ويأكل تين ويغسل أيدينه ويغسل أيدينه
وبعد اذا لبسته ثيابه ٌأقول له لبسوا منتظر دراعته وسلموا منتظر شهادته وأعطوا منتظر هديته وقولوا لا اله الاالله وعلى منتظر ما شاء الله وعوذوه بالله والنبي وعن عين الحاسدي
واذا جيت أغير له الحفاض أكرمكم الله اقول له يالله يالله يالله بنسوي نظافه لمنتظر يالله يالله يالله بنسوي نظافه الى القمر
وآخر وهذه علشان يعرف اسمه أنا اسمي منتظر أنا شاطر وقمر ماما وباباب يحبوني يسبحوني وينظفوني أنا اسمي منتظر أنا شاطر وقمر ما ما وبابا يحبوني يضحكوني ويلاعبوني
وسلامتكم